Bilang ng likes sa FB, itatago na para hindi makasira ng pag-iisip

Ryan B. Sison / Boses

HINDI na ipakikita ang bilang ng mga like sa posts.

Ito ang pinag-aaralan ng Facebook dahil ang bilang ng likes o reacts na umano ang na­giging basehan ng pagiging katanggap-tanggap sa internet, gayundin, nakararamdam ng sense of validation ang user kapag nakaku­kuha ng maraming likes.

Paliwanag ng mga eksperto, ang pagka­humaling sa “likes” na nakukuha sa post ay natural na reaksiyon ng utak dahil sa satis­faction mula rito.

Partikular umano ito sa mga indibidwal na hindi nakakukuha ng ganitong pagtanggap mula sa mga kaibigan o pamilya kaya kapag nakukuha nila ito sa socmed, dito pumapa­sok ang pagiging conscious sa bilang ng likes o reacts.

Ayon sa social media giant, ang epektong ito ay hindi dapat makuha ng users kaya pi­nag-aaralan na nila ang pagtatago ng bilang ng likes sa mga post.

Sa hakbang na ito, inaasahang mababa­wasan ang pressure na makakuha ng ma­raming likes gayundin, para magpokus ang netizens sa content o nilalaman ng post.

Base sa social media statistics ng Hoot­suite at We Are Social, ngayong 2019, 76 milyong Pinoy ang aktibo sa social media kung saan apat na oras o higit pa kada araw ang inilalaan ng mga ito, partikular sa Facebook.

Sa totoo lang, wa’ ‘wenta ang maraming likes o comments para maramdaman nating katanggap-tanggap ang ating socmed post da­hil hindi natin kailangan ng validation mula sa ibang tao.

Tandaan, lahat ng nakikita sa socmed ay ‘filtered’ at hindi nito sinasalamin ang totoong kuwento ng buhay ng mga nagpo-post kaya tama lang na huwag nang ipakita ang bilang ng likes dahil hindi naman ito mahalaga.

‘Ika nga, aanhin pa ang napakaraming likes sa FB kung hindi ito magagamit sa totoong buhay?

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.