Sen. Drilon, aminadong palpak ang GCTA law ni ex-P-Noy
HIRIT NI SEN. DRILON, PALPAK ANG GCTA LAW—Inamin ni Sen. Franklin Drilon na may mga pagkakamali sa panukalang-batas na Good Conduct Time Allowance (GCTA) Law na nilagdaan at isinabatas ni ex-P-Noy dahil hindi naging malinaw sa batas na ito kung kasama o hindi sa mabibiyayaan sa GCTA ang mga napan sa mga kasong heinous crimes.
Kumbaga, parang inamin na rin ni Sen. Drilon na palpak ang batas na GCTA ni ex-P-Noy, tsk-tsk-tsk!
◘◘◘
SEN. GORDON, BAKA MAKATIKIM NG BANAT KAY P-DUTERTE? —Ayon kay Sen. Richard Gordon, mali raw na ipagtanggol ni P-Duterte si ex-BuCor Chief Nicanor Faeldon, dahil base raw sa imbestigasyon nila sa Senado, inabuso nito (Faeldon) ang kanyang tungkulin sa pagpapalaya sa mga kilabot na kriminal.
Naku, baka makatikim na naman si Sen. Gordon ng banat kay P-Duterte tulad ng pag-atake ng pangulo sa kanya nang kuwestiyunin niya noon ang militarisasyon sa Duterte gov’t., boom!
◘◘◘
IPE, DAPAT DUMISTANSIYA MUNA KAY P-DUTERTE — Matapos madakip sa drug-bust operation ang pamangkin ni Phillip Salvador na si Deborah Sun (Jean Louise Salvador), dapat dumistansiya muna ang aktor kay P-Duterte.
Hindi magandang tingnan na galit si P-Duterte sa mga sangkot sa droga tapos didikit-dikit sa kanya si Ipe na may pamangkin na sabit sa droga, period!
◘◘◘
QUEZON CITY, MAY JUETENG NA, MAY LOTTENG PA!—Lantaran na raw ang operasyon ng raket na jueteng at lotteng sa Quezon City.
O, ano pa ang hinihintay n’yo, Mayor Joy Belmonte at Quezon City Police District (QCPD) Director Brig. Gen. Joselito Esquivel, Jr.? Aksiyon na, ipatokhang n’yo na ang mga jueteng at lotteng operators sa QC, dali!
Comments