2020 National budget, minadali!
- BULGAR
- Sep 9, 2019
- 2 min read
TINAPOS na ng House Appropriations Committee ang pagdinig sa pambansang badyet para sa taong 2020 sa loob lamang ng ilang araw.
Believe it or not!
◘◘◘
AYON sa pinuno ng komite na si Cong. Isidro Ungab, ‘in record time’ nila tinapos ang pagtalakay sa pambansang badyet.
Ito ay dahil daw sa hangarin ng liderato ng Kamara na maaprubahan sa Kongreso ang badyet bago mag-October 4.
Talaga lang, ha?
◘◘◘
IPINAG-UTOS ni Speaker Alan Peter Cayetano na alas-5:00 ng hapon umpisahan ang sesyon upang matalakay ng kanyang komite ang badyet sa apat na departamento at ahensiya ng gobyerno mula Lunes hanggang Biyernes.
Tiniyak din na walang “pork” at “illegal insertions” ang 2020 National Budget!
◘◘◘
SI Speaker Cayetano rin ang nagrekomenda na ang mga vice-chairman ng komite ang magsasagawa ng pagdinig sa badyet.
Ito ay matapos pormal na buksan ni Rep. Ungab ang hearing upang mas mabilis ang proseso at walang masayang na oras!
◘◘◘
SOBRA-SOBRA ang pasasalamat ni Rep. Ungab sa liderato ng Kamara at sa kapwa kongresista na tumulong sa mabilis at epektibong proseso ng budget hearings.
Pinasalamatan niya ang mga kongresistang tumugon sa tawag ng tungkulin sa pag-aaral at pagrepaso sa isinumiteng badyet ng mga ahensiya ng gobyerno!
◘◘◘
NAKATULONG din ang presensiya ng mga kalihim at pinuno ng mga government department at agency sa mga budget hearing dahil mabilis na nasagot ng mga ito ang katanungan ng mga kongresista.
Ang mga nakaraang budget hearing sa Kamara, kadalasan ay inaabot ng hanggang ikatlong linggo ng Setyembre ang pagdinig, ngunit, sa liderato ni Speaker Cayetano, natapos ang pagdinig noong Biyernes, September 6.
Pambihira ini!
◘◘◘
UMPISA na rin bukas, Setyembre 10 ang sponsorship at floor deliberations sa HB 4228 o pambansang badyet.
Target ng Kamara na mapagtibay ang panukala bago mag-October 4!
◘◘◘
AYON kay Speaker Cayetano, “work, work, work” ang nasa puso ng mga kongresista.
Ito ay upang matupad ang hangarin ni P-Digong para sa mga Pinoy!
Comments