Sinita sa illegal parking.. Rider, 2 pa pumalag sa traffic enforcer, huli

ARESTADO ang tatlong lalaki na umano’y nanlaban sa traffic enforcer sa Valenzuela City, kamakalawa ng hapon.

Kinilala ni Valenzuela Police Chief P/Col. Carlito Gaces ang mga naarestong suspek na sina Salvador Cabansag, Jr., 49; Andrew Salonga, 33, at Chris Jerwin Cortez, 25.

Alas-2:00 ng hapon nang hulihin ni Valenzuela City Traffic Enforcer Mark David Farmer, 30, si Cabansag dahil sa illegal parking.

Nang isyuhan ito ni Farmer ng Ordinance Violation Receipt (OVR) ticket, tinangka umanong paandarin ni Cabansag ang motorsiklo na naging dahilan upang pigilan ito ng enforcer bago hinablot ang susi ng motorsiklo.

Dumating sina Salonga at Cortez saka tinulungan si Cabansag bago sapilitang kinuha ang susi subalit, napansin ang kaguluhan ng iba pang miyembro ng Traffic Management Office kaya humingi ang mga ito ng tulong sa pulisya na nagresulta sa pangkakaaresto sa mga suspek.