Faraon at raga, pasok sa world 9-ball China

NAKALUSOT sa quali­­fying stage sina Raymond Faraon at Anthony Raga upang samahan sina Carlo Biado at Johann Chua sa pagdadala ng tatlong kulay ng Pilipinas sa main stage ng World 9-Ball China Open 2019 sa Pudong Tangzhen Culture & Sports Center ng Shanghai, China.

Nagposte si Faraon ng limang sunod na panalo para makahakbang sa susunod na yugto ng kompetisyong magkakaloob ng $40,000 sa magkakampeon sa kalala­kihan at kabuuang $208,000 para sa mga papasok sa winners’ circle.

Biniktima ng Pinoy sina Xu Xiaocong (China, 9-7), Wu Kun Lin (Taiwan, 9-6), Chang Chih Yang (Taiwan, 9-7), Michael Feliciano (Philippines, 9-6) at Aung Moe Thursday (Burma, 9-2).

Sa kabilang dako, pag­katapos ng opening round bye, naungusan ni Raga sina Shen Shenyi (China, 9-2), Liu Yexu (China, 9-4) at Thorsten Hohmann (Ger­many, 9-4) bago nakatikim ng dobleng blackeye sa ka­may ng mga Pinoy ang Intsik na si Xiacong dahil dinaig din siya ni Raga sa iskor na 9-1.

Samantala, hindi du­maan sa elimination round sina Biado at Chua dahil sa mataas na world rankings na naghahangad na makakuha ng premyong $373,000.

Makikipagtagisan ng ga­ling si Biado sa Group F kung saan may double eli­mination na format habang si Chua ay sa Group A.

Si Raga ay nakapuwesto sa Group B habang sa Group E si Faraon. Sa ka­babaihan, nakasalang sa main draw sina Rubilen Amit at Chezka Centeno para sa Group B at F.