Polio, ‘wag nang hintaying bumalik bago umaksiyon

RYAN B. SISON / BOSES

Hindi pa man nasosolusyunan ang den­gue at leptospirosis, polio naman ang dapat tutukan ng gobyerno.

Pagkalipas ng 19 taon nang ideklarang polio-free ang Pilipinas, nangangamba ang Department of Health (DOH) na muling bumalik ang sakit sa bansa.

Ito ay matapos magpositibo ng isang im­burnal sa Maynila sa vaccine-derived polio­virus na lumalabas sa dumi ng mga batang nabakunahan kontra polio. Gayundin, hindi umano dapat hayaang makapasok sa kata­­wan ng tao ang naturang virus.

Kaugnay nito, pinag-iingat ng DOH ang publiko laban sa poliovirus na maaaring ma­kuha sa maruruming kapaligiran.

Dagdag pa ng ahensiya, maaari itong kuma­lat sa pagkain o inumin na kontaminado ng dumi ng may impeksiyong tao.

Gayunman, dahil nakukuha ang poliovi­rus kapag may naisusubong kontaminadong dumi, isa sa mga isinusulong ng DOH ang swim­ming ban sa Manila Bay dahil kapag luma­ngoy ang mga bata, partikular ang mga wa­lang bakuna kontra polio at nakalunok ng tubig, malaki ang posibilidad na makakuha sila ng sakit.

Ilan sa mga sintomas ng polio ay lagnat, pagtatae at pananakit ng ulo at katawan ha­bang ang sinumang magkakaroon nito ay maaaring manghina, malumpo, habambuhay na maparalisa o mamatay.

Samantala, para mapanatiling polio-free ang bansa, target ng ahensiya na mabakuna­han ang 95% ng mga batang nasa edad 5 pababa pero, noong 2018, 66% lang ang nabakuhanan dahil lumabas sa pag-aaral na bumaba ang tiwala ng mga magulang sa ba­kuna na mula sa 80%, bumaba ito sa 32%.

Kunsabagay, hindi natin masisisi ang mga magulang na matakot sa pagpapabakuna ng kanilang mga anak dahil sa kontrobersiya ng Dengvaxia.

Sa totoo lang, hindi dapat isnabin ang babala ng ahensiya hinggil sa polio dahil nakama­matay ito kaya panawagan sa mga magulang, huwag na nating hintayin na muling bumalik ang sakit bago gumawa hakbang para mai­wasan ito.

Bukod sa pagpapabakuna kontra polio, dapat nating panatilihing malinis ang katawan at kapaligiran dahil ‘ika nga, prevention is better than cure!

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.