Pantay na karapatan sa edukasyon para sa normal at special children

KUYA WIN GATCHALIAN / WIN TAYONG LAHAT

AYON sa isa sa mga sumulat ng aklat na “Teaching and Learning in the 21st Century: New Solutions to New Problems” na si William Glasser, pare-pareho lamang ang mga panga­ngailangan ng tao.

Kabilang dito ang kahalagahan para sa mga mag-aaral na mabuhay nang maayos, mapayapa at maging ligtas mula sa kapahamakan — sa loob at labas ng paaralan at tahanan.

Upang makamit nila ito, kailangang mapunan ang pangunahing pangangailangan nito.

Sa loob ng klasrum, hindi maiiwasang may mga pagkakaiba-iba ang mga estudyante pag­dating sa kanilang pag-aaral tulad ng pisikal, pi­nansiyal, emosyunal, panlipunan at sikolohi­kal nilang kondisyon. Ito ang tinatawag nating diversity of learners.

Kaya ang hamon sa ating mga guro ngayon, kilalanin at unawain ang kanilang mga estud­yante at lubos na ipadama sa kanila ang pag­tanggap at pagmamalasakit.

Sila ang nakaaalam ng kahinaan, galing, abilidad at pag-uugali ng kanilang mga estud­yante na maaari nilang gamitin bilang oportu­nidad upang matulungan ang mga ito na madis­kubre ang kanilang mga kakayahan, kaalaman at kapasidad para makapamuno at maibahagi rin ito sa iba.

Ang iba sa kanila ay may taglay na panga­ngailangan sa pisikal (bingi, bulag o orthopedic impairment), cognitive (tulad ng autism o intel­lectual handicaps), psychological (anxiety dis­order, attention deficit, hyperactivity disorder) at komunikasyon (speech impairments o speech-based developmental disorder).

Ang iba naman ay mayroong mas mababaw o higit pang aspeto ng pangangailangan bukod sa mga nabanggit.

Sa kabila ng pagkakaiba-iba ng mga mag-aaral, walang bata ang dapat mapagkaitan ng karapatan sa de-kalidad na edukasyon.

Ito ay dapat naaayon sa kanyang abilidad at oportunidad na mapagtibay ang kanyang mga kakayahan upang maabot ang pinakama­taas na kapasidad para sa sarili at maging sa kanyang kapwa.

Bilang mambabatas, tayo ay nagsumite ng panukalang-batas ngayong ika-18 Kongreso na Senate Bill No. 171 o Inclusive Education for Children and Youth with Special Needs Act upang maipagpatuloy sa mga pampublikong pa­aralan sa buong bansa ang ating naumpisa­hang pagpapatayo ng mga resource center para sa mga estudyanteng may espesyal na panga­nga­ila­ngan.

Patunay nito ay ang itinayong pasilidad sa Valenzuela City Special Education o ValSPED.

Tungkulin ng pamahalaan na magkaloob ng pantay na edukasyon sa mga mag-aaral. Ang edukasyon na libre, de-kalidad at inklusibo ay para sa lahat kung saan walang batang mapag-iiwanan at wala dapat makahadlang sa kanilang katayuan, kasarian, sosyal at kapansanan na pagkakaiba-iba.

Higit sa lahat, lubos na makatutulong ito sa kanilang pag-aaral at pakikisalamuha sa iba. Espesyal man o hindi, anuman ang pagkaka­ham­bing o pagkakaiba, ang bawat isa ay may pa­rehong karapatan, prebilehiyo at pagkaka­taong maranasan ang magandang edukasyon.

Kaya naman, alang-alang sa kapakanan ng mga bata at kabataang may partikular na pa­ngangailangang pampisikal, emosyunal at kaisi­pan, bilang lingkod-bayan ay katuwang tayo sa pagkakaloob ng pantay at patas na oportu­nidad upang maibahagi ang mga pangangaila­ngan sa edukasyon ng kabataan. Pagtulung-tu­lungan nating makamit ito.

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City o mag-email sa surewin.bulgar@gmail.com