10PM-4AM curfew, anak pagala-gala | MAGULANG, KULONG!

SINIMULAN nang ipatupad ng Lungsod ng Maynila ang ordinansa sa curfew ka­sabay ng babala sa mga magulang na ma­parurusahan sakaling lumabag dito.

Batay sa Ordinance No. 8547, itinatakda ang curfew hours sa siyudad mula alas-10:00 ng gabi hanggang alas-4:00 ng madaling-araw.

Ang istriktong pagpapatupad sa curfew hour sa mga menor-de-edad ay iniutos ni Manila Mayor Isko Moreno matapos ang natanggap na tawag mula sa concerned citizen sa Delpan dahil sa mga nagra-riot na kabataan.

Posibleng maparusahan ang mga lalabag sa ordi­nansa na mga magulang mula 17-anyos pababa, depen­de sa edad ng mga kabataan.

Nabatid na ang edad 12 pababa ay may penalty na P5,000 o pagkakakulong nang anim na buwan.

Habang ang 13-14 anyos ay may multa na P3,000 o parusang kulong na hanggang tatlong buwan.

Samantala, ang 15-17 na edad ay may P2,000 multa o hanggang isang buwan na pagkakakulong.

Kaugnay nito, inatasan ni Moreno ang Manila Police District (MPD) na hanapin at arestuhin ang mga supplier ng solvent sa mga batang lansangan.