PINOY JUDOKA, NABIGO SA WORLD JUDO PRELIMS

BIGONG makausad sa preliminary rounds ang dalawang miyembro ng Philippine National team matapos masadlak sa kani-kanilang asignatura sa Day 2 ng 2019 World Judo Championships kahapon sa Nippon Budokan sa Tokyo, Japan.

Nasayang ang half-point Waza-Ari ni women’s under 52kgs Half-Lightweight judoka Khrizzie Pabulayan nang talunin ito ni Ana Perez Box ng Spain sa pamamagitan ng pinning technique sa nalalabing 2:55.

Nagawang mapuntusan ni Pabulayan si Perez-Box sa pamamagitan ng isang counter attack, ngunit bago rito ay nauna nang nakuha ni Perez ang UST judoka ng Sankaku Jime o ground technique pero nakatakas si Pabulayan para sa unang waza-ari ng Spanish judoka.

Tuluyang naipanalo ni Perez ang laban nang ma-pin ang 22-anyos na UAAP MVP.

“Sayang po iyong chance na naiskoran ko siya. Pero malaki pong experience ito na makapaglaro sa Worlds kasama iyong mga world champions at world class athletes,” pahayag ni Pabulayan sa BULGAR na umaasang makakasama sa listahan ng lalaro sa Kurash sa 30th Southeast Asian Games sa bansa.

Nasayang din ang pagkakataon ni Filipino-Japanese Shugen Nakano sa men’s under 66kgs half-light category nang talunin ni Patryk Wawrzyczek ng Poland matapos makuha ang dalawang waza-ari points sa isang counter at Ashiwaza o Leg techniques sa nalalabing 1:07 ng laro.

Ang 22-anyos na si Nakano ay sasabak sa biennial meet judo event simula Dis. 4-7 sa Laus Group Event Center sa Clark, Pampanga.

Sasabak ngayong araw sa 8-day tournament ang Fil-Jap players na sina Megumi Delgado at Rena Furukawa sa women’s under 57kgs Lightweight division at 2017 SEA Games bronze medalist Keisei Nakano sa men’s under 73-kgs lightweight category.