MMDA, imbes na isabotahe, tulungan para matinding trapiko, matuldukan!

RYAN B. SISON / BOSES

HINDI pa nasosolusyunan ang matinding trapik sa bansa, pero mukhang may nanana­botahe na dahil sa pag-iiwan ng isang malaking karton na inakalang naglalaman ng bomba sa ilalim ng overpass sa EDSA.

Dahil dito, napilitan ang Metropolitan Manila Development Authority (MMDA) na ipasara ang bahagi ng kalsada na pinagla­lagyan ng karton nang sa gayun ay walang mapahamak na mamamayan.

Gayunman, marami ang naperhuwisyo dahil sa nangyari matapos nitong palalain ang kalagayan ng trapiko sa lugar.

Samantala, sa ngayon ay hindi pa natutukoy kung sino ang nag-iwan ng nasabing karton, pero handa umano itong kasuhan ng ahensiya dahil sa pagiging iresponsable.

Dagdag pa rito, kung hindi man ito pana­nabotahe, hindi tama na mag-iwan ng karton na puno ng styrofoam dahil hindi naman tapunan ng basura ang EDSA.

Nakadidismaya, dahil imbes na tulungan ang ahensiya, eh, dinaragdagan pa ang kani­lang problema.

Bagama’t, may mga pagkukulang sila, hindi ito dahilan para pasamain pa ang kani­lang imahe, lalo na at hindi lang sila ang apek­tado kundi maging ang iba nating mga kaba­bayan.

Kaya ang panawagan para sa lahat, ma­ging responsable tayo at huwag nang dumag­dag sa problema para ang mga ito ay matul­dukan na!

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.