SEAG VENUES, INILIPAT

MAGKAKAROON ng ilang pagbabago o paglipat sa ilang venues para sa 30th edition ng Southeast Asian Games (SEAG) bago ang pagbubukas nito simula Nobyembre 30-Disyembre 11.

Ang pamosong volleyball event ay dadalhin na sa Ninoy Aquino Stadium sa loob ng Rizal Memorial Sports Complex (RMSC) sa Maynila.

Gaganapin ang gymnastics (aerobic, rhythmic, artistic) sa Philsports Arena, samantalang ang taekwondo at weightlifting ni Rio Olympics silver medalist Hidilyn Diaz ay ita-transfer sa Rizal Memorial Coliseum.

Sasalang na rin sa UP Sunken Garden ang obstacle course, habang ang petanque ay hahanapan pa ng ibang venue sa New Clark City Sports Complex (NCCSC) sa Tarlac. Inilagay sa rehabilitasyon ang RMSC at Philsports Arena para pagganapan ng ilang sports event ng biennial meet. Gaganapin din ang football, squash, tennis at soft tennis sa RMSC.

Malapit na ring buksan ang NCCSC sa Capas, Tarlac na may 20,000 seating capacity at 12,796 square meter Aquatic Center na pagdarausan ng athletics, lawn bowl (Clark Global City), shooting (Pradera Verde, Lubao, Pampanga), archery at rugby 7’s (Parade Grounds), baseball at softball (The Vil­lages), dance sports (Royce Hotel), golf (Luisita), judo, jujitsu at kurash (Laus Group Event Center), arnis, sambo, wrestling (Angeles University Foundation) at wakeboarding (Deca Wakeboard Park).

Idaraos sa Subic ang triathlon, duathlon, open water swim at modern pentathlon (Subic Bay Boardwalk), sepak takraw (Subic Gym), beach volleybal at beach handball (Subic Tennis Courts), muay, pencak silat at table tennis (Subic Bay Exhibition and Convention Center), canoe/kayak at dragon boat (Malawaan Park), chess (Rialto Function Room) sailing (Subic Bay), wind surfing (Lighthouse Hotel Area) at rowing (Triboa).