Isla ng boracay, nililinis ng mga pinoy, binababoy ng mga turista
NILILINIS natin ang Isla ng Boracay tapos bababuyin lang ng mga turista?
Kamakailan, nag-viral sa social media ang video kung saan pinadudumi ng turista ang kanyang anak sa mismong dalampasigan ng isla, samantalang, sa isa pang bahagi ng video, makikitang ibinabaon na ang gamit na diaper sa buhanginan. Tsk!
Kaugnay nito, pansamantalang isinara ang Station 1 kung saan naganap ang diumano’y pambababoy sa isla, kasunod nito ay ipinagbawal na rin ang paglangoy doon upang ma-examine ang tubig sa bahaging ‘yun ng isla, sino ba ang may gusto niyan?
Samantala, inaalam na ngayon kung sino ang turista sa nasabing video. Ang tanong naman natin ngayon, bakit hindi sinaway ng kumuha ng video ang ginawang pambababoy? Mas mahalaga bang ikalat ito sa social media kaysa sitahin ang salarin at panatilihing malinis ang kapaligiran? Hindi ba, may “sin of commission” at “sin of omission”, baka puwedeng itanong sa kumuha ng video kung anong nasyunalidad ng turista para mapadali ang paghahanap ng mga awtoridad?
Matatandaang, anim na buwan ipinasara ang isla para sa rehabilitasyon nito kung saan hindi biro ang nangyaring paglilinis kaya ang ganitong insidente ay nakadidismaya talaga!
Comments