PASADO NA SA SEAG ANG NEW CLARK-SUBIC SPORTS COMPLEX

NOBENTA’Y TRES na porsiyento nang handa ang New Clark City Sports Complex, ilang buwan bago ang nalalapit na opening ng 2019 Southeast Asian Games sa Nobyembre 30.

Malapit nang magamit ng pambansang koponan ang mga naturang pasilidad ayon kay Bases Conversion and Development Authority at Philippine Southeast Asian Games Organizing Committee (PHISGOC) venue manager Engr. Jerico Bondoc.

Opisyal na isesertipika ng International Association of Athletics Federations (IAAF) at Federation Internationale de Natation o International Swimming Federation (FINA) ang Athletics Stadium na mayroong 20,000 seating capacity at ang 12,796 square meter Aquatic Center bilang class 1 sports venues.

Naging saksi mismo si Philippine Sports Commission (PSC) at Chef de Mission William “Butch” Ramirez sa paghahanda sa mga venues sa pagbisita ng grupo sa New Clark City sa Capas, Tarlac at sa Subic, Zambales. “We are thankful to the President for supporting Philippine sports,” pahayag ni Ramirez, kasama sina Deputy Chefs de Mission Stephen Fernandez, Commissioners Ramon Fernandez, Charles Maxey at Arnold Agustin noong Martes.

Unang sinilip ng grupo ni Ramirez ang Subic Boardwalk na pagdarausan ng mga event sa triathlon, duathlon, open water swim at modern pentathlon. Kasunod na pinuntahan ang Subic Covered Court Gym na magiging venue ng sepak takraw at Subic Tennis Courts na magho-host ng beach handball at beach volleyball competitions sa biennial meet.

Tinungo rin nila ang Subic Bay Exhibition and Convention Center (SBECC) kung saan gaganapin ang mga events sa muay, pencak silat at table tennis.

Magpapartisipa rin sa dalawang naturang venues ang sailing, windsurfing, arnis, sambo, wrestling, dance sport, athletics, aquatics at chess. Ang NCC ay binubuo ng 525 bilang ng kuwarto na may 2,100 beds, kabilang ang gym, cafeteria, mess hall, mini pool, basketball court, habang nalalapit lamang sa track and field oval, na tinatayang bubuksan sa Nobyembre 20. May kabuuang 530 events sa 57 sports ang gaganapin sa biennial meet.