Ex-BF, 'wag na raw guluhin dahil may Nicole na… WINWYN, BINANTAAN NG FAN SA PANG-AAHAS KAY MARK

Nitz Miralles / BIDA

HINDI nakatiis si Winwyn Marquez at sinagot ang basher na nag-comment na kaya siya blooming ngayon ay dahil break na sila ni Mark Herras. Pinayu­han si Winwyn na ituloy ang pagmu-move on at ‘wag nang magpa­pansin kay Mark dahil nakakahiya raw kay Nicole Donesa, ang nali-link sa ex-BF niya ngayon.

Ang ikinagalit siguro ni Winwyn ay ang sinabi ng basher na baka aha­sin niya si Mark kay Nicole.

“Push pa natin if blooming, hahaha. And ahasin? Ano ‘yun? If @herrasmarkangeloofficial and @nicole_donesa are happy, then let them be. And if wala ka magawa, stop commenting on my feed.”

Ayaw papigil ng basher nang sabihing ayaw lang daw aminin ni Winwyn na bitter siya sa breakup nila ni Mark.

Nakakaloka dahil friends pa rin sina Winwyn at Mark kahit wala na silang relasyon, kaya ang mga followers pa yata nila ang gagawa ng isyu para sila’y mag-away.

Mabuti na lang at busy si Winwyn sa pagiging kontrabida sa Afternoon Prime ng GMA-7 na Dahil sa Pag-ibig at enjoy siya sa karakter niyang si Portia, kaya hindi masyadong nagpapaapekto sa mga bashers.

Saka, pare-parehong Kapuso talents sina Winwyn, Nicole at Mark at baka nga magkasama pa sila sa future soap ng GMA-7 kaya hindi maganda kung may animosity sa pagitan nila.