MAPIPIGILAN BA NG SKIPPERS ANG TIKAS NI BLACK SA ONLINE?

ISA na namang natatanging performance ang inaasahang muli mula kay Aaron Black sa 2019 PBA D-League Foundation Cup sa pagharap ngayong hapon ng kanyang koponang AMA Online Education kontra Marinerong Pilipino sa Ynares Sports Arena sa Pasig City.

Sa unang dalawa nilang laro sa developmental league, umiskor ng magkasunod na triple double ang anak ni PBA great at kasalukuyang Meralco coach Norman Black. Nagposte si Black ng average na 25.5 puntos, 15.5 rebounds, at 12.5 assists sa nasabing dalawang laro na kinabibilangan ng 26-puntos, 16-rebounds at 14-assists na performance sa 110-92 panalo ng Titans kontra iWalk na nag-angat sa kanila sa patas na markang 1-1, panalo-talo. Dahil dito, inaasahang paghahandaang mabuti ng Skippers na mapigil si Black sa pagharap nila sa Titans sa tampok na laro ngayong 5:30 p.m.

Mauuna rito, magtutunggali sa pambungad na laro ang Italiano’s Homme at Technological Institute of the Philippines ng 1:30 p.m. na susundan ng salpukan ng Centro Escolar University at ng Nailtalk ng 3:30 p.m. (VA)