Hamon ng DILG sa mga landowner | Mga bakanteng lote, gawing paradahan ng sasakyan!
DAHIL sa matinding trapik na ating nararanasan sa kasalukuyan, isinusulong ang “no parking, no new car” nang sa gayun ay maiwasan na ang iligal na pagpa-park ng mga sasakyan sa mga lansangan na nagpapasikip sa daanan ng mga mamamayan.
Gayunman, bukod sa nasabing solusyon ay hinikayat ng Department of the Interior and Local Government (DILG) ang mga alkalde na gamitin ang mga bakanteng lote bilang paradahan upang makatulong sa pagpapagaan ng nasabing problema.
Samantala, dapat makipag-ugnayan ang mga alkalde sa mga may-ari ng pribadong lote para malaman kung suportado nila ang nais ng ahensiya.
Pero, hindi umano kailangang mangamba ng mga may-ari dahil ito ay ‘win-win solution’ kung saan kikita na ang lot owners, makatutulong pa sa local government dahil mapapaluwag ang mga kalsada, lalo na kung matagal na itong nakatengga.
Sa totoo lang, maganda ang solusyong ito kung ang lahat ay makikipagtulungan.
Pero siyempre, hindi natin puwedeng diktahan ang mga may-ari kung mayroon na silang kani-kanyang plano para sa kanilang lupang pagmamay-ari, kaya habang wala pang kongkretong desisyon, mas mainam na tayong mga mamamayan ang mag-adjust para sa ikaluluwag ng kalsada.
Dagdag pa rito, kung bukas naman ang isipan ng mga landowners ay ipananawagan nating tumulong sila sa gobyerno sa pamamagitan ng pakikipag-ugnayan sa LGUs para masolusyunan ang problema sa trapiko hindi lamang sa Metro Manila kundi sa buong bansa.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments