Divorce sa ‘Pinas, pabor sa mahihirap

BOBI TIGLAO / BANAT

MUKHANG karamihan sa mga mamba­batas ay suportado na ang pagsusulong ng divorce o legal na paghihiwalay ng mag-asawa kung mapatutunayan o lumalabas na hindi na sila karapat-dapat magsama.

Ito ay panukalang-batas na matagal nang isinusulong sa Senado at Kamara.

Alam n’yo bang sa buong mundo, ang Pilipinas at Vatican City na lang ang tanging mga bansa na nagbabawal dito?

Ang dahilan, hindi ito sinasang-ayunan ng Simbahang-Katolika. Malakas ang pu­wersa at sigaw ng mga taga-Simbahan at iba pang konserbatibong sektor para ibasura ang panukala.

Ang nakadidismaya, dahil sa takot ng ibang pulitiko at maging ang mga nakaraang pa­ngulo sa Simbahang-Katolika na hindi sila susuportahan sa panahon ng eleksiyon ay wa­lang naglakas-loob sa kanila na isabatas ito.

Ang nangyari ay celebrity, negosyante at iba pang mayayamang tao lang ang may ka­kayahang magawa ang “legal na paghihiwa­lay” sa pamamagitan ng “annulment” sa korte.

Ang kilalang nakagawa nito ay si Kris Aquino, anak ni dating Pangulong Cory Aqui­no na gustong gawing “santa” ng mga Ka­toliko.

May iba namang ilang beses mang maka­pagpa-”annul”, milyun-milyon naman ang nagagastos sapagkat malaki ang sinisingil ng mga abogado sa ganitong kaso dahil sa matagal na proseso nito.

Para sa atin ay kahibangan ang pagbaba­wal ng divorce. Kapag hindi magkasundo ang mag-asawa, hindi nila kailangang magtiis o manghinayang sa mahabang panahon na kanilang pinagsamahan.

Walang sinuman ang karapat-dapat na manatili sa ‘ika nga nila, “toxic na relasyon”.

Isa pang punto, dahil sa kapusukan, ilan sa mga kabataang babae ang napipilitan lang mag-asawa o magpakasal dahil nabuntis sila.

Eh, kung hindi nila ‘yun mapag-isipang mabuti, hindi ba, dapat payagan silang itama ang pagkakamali at payagan silang mag-divorce?

Nakakaawa ang mga kababaihan dahil marami sa kanila ang biktima ng pananakit at pang-aabuso kung saan gustuhin man nilang mag-asawang muli upang may ma­katuwang sa buhay lalo na ‘yung hindi ga­anong naka­pag-aral o walang stable na tra­baho ay hindi nila magawa dahil sabihin man na hiwalay na sila ay kasal pa rin sila sa ‘papel’.

Isa pa, kawawa rin ang anak ng babae sa kanyang bagong partner dahil itinuturing ito na hindi lehitimo (illegitimate) sapagkat hin­di puwedeng kunin ng bata ang apelyido ng kanyang ama dahil hindi kasal ang kanyang mga magulang.

Pabor sa maraming mahihirap kung papayagan ang divorce kung saan makapag-aasawa silang muli at makakasama nila ang taong tunay nilang gustong makasama sa buhay.

Sa wakas, tila mangyayari na ang pagsa­sabatas ng divorce dahil sa unang pagkaka­taon ay nagkaroon ng pangulo ang Pilipinas, si Pangulong Rodrigo Duterte, na hindi takot sa Simbahang-Katolika.