ENERGY DRINK, PINAKABOG ANG ALBEREI SA D-LEAGUE

BUMALIKWAS ang Black Mamba mula sa 18 puntos na pagkakaiwan sa bungad ng 4th canto upang magapi ang kapwa baguhang Alberei, 86-82, kahapon sa 2019 PBA D-League Foundation Cup sa Ynares Sports Arena sa Pasig.

Isinalansan ni Dahrell Caranguian ang 9 sa kanyang kabuuang 22 puntos sa 4th period kung saan pinamunuan niya ang inilatag na 21-0 run ng Energy Drink na bumura sa 79-61 kalamangan ng Kings at nagbigay ng 82-79 bentahe sa kanilang panig, may 2:32 pang nalalabi sa oras.

“I told them, we just have to play tough defense,” wika ni Black Mamba coach Vis Valencia tungkol sa nasabing paghabol nila. “We’re trying to do full court press. We’re already down, so kahit ano na, and ‘yun ang nag-work.”

Nagtala rin si Caranguian, produkto ng De Ocampo Memorial College ng 7 rebounds at 2 assists. “’Yung familiarity ni Dahrell with the system, I was glad that he responded with it,” ayon pa kay Valencia.

Nagdagdag si Clark Derige ng double-double 14 puntos at 11 rebounds bukod pa sa 3 steals, kasunod si John Tayongtong na may 10 puntos, 3 rebounds at tig-isang assist, at block.

“Sabi ko lang, I want our first game to be a statement. We’re a rookie team so I just want us to have a good start,” dagdag pa ni Valencia. (VA)