Malakas na pag-ubo, nakakaluslos
Dear Doc. Shane,
Ang problema ko ay ang pagsakit ng aking bayag. Kapag kinakapa ko ito ay parang mas malaki ‘yung isa na sumasakit. Gusto kong malaman kung ito ba ang tinatawag na luslos, mayroon bang posibilidad na ako ay maoperahan? — Edgar
Sagot
Ang paglaki ng bayag ng lalaki ay maraming puwedeng dahilan.
Ang luslos o hernia ay kondisyon kung saan hindi kumpleto ang pagkakahiwalay ng bayag sa loob ng tiyan kaya maaaring lumuslos ang bahagi ng bituka sa bayag. Ito ay puwedeng magdulot sa paglaki ng bayag at pagkirot. Sa luslos, kalimitan ay hindi pantay ang paglaki ng bayag (halimbawa, mas malaki sa kanan kaysa kaliwa).
Ang pagkakaroon ng luslos ay nakukuha sa pagkabata pa lang ngunit, ito ay maaaring sumumpong dahil sa pagbubuhat ng mabibigat, pag-ubo ng malakas, pag-iri o kung bumibigat ang timbang. Ito ay maaaring kusang mawala at muling bumalik.
Bukod dito, ang pagkakaroon ng tumor sa bayag ay isa ring posibilidad, gayunman ipinapayong magpasuri agad sa doktor upang matukoy ang sanhi ng paglaki at pagsakit ng iyong bayag.
Comments