Nagnakaw ng panty | CONSTRUCTION WORKER, PINATAY SA GULPI

UTAS ang isang construction worker makaraang mabugbog nang mapagbintangang nagnakaw ng mga panty ng dalawang babae sa Tagbiliran City, Bohol, kamakalawa ng gabi.

Kinilala ni Police Corporal Joseph Elic ang napatay na si Jessie Chan Romorosa, 39, residente ng Bgy. Tupas, Antequera.

Si Romarosa ay naimbitahan ng kanyang kaibigan na dumalo sa piyesta ng Bgy. Dampas, kamakalawa ng hapon at kapwa sila bumisita sa bahay ng isang Dioscoro Daño sa Sitio Candait.

Nagkaroon ng inuman hanggang sa bandang alas-6:00 ng gabi ay minabuti ni Daño na magpahinga ngunit, nagising sa komosyon.

Binugbog umano ng anak ni Daño na si Jestoni, 28, si Romorosa na pinaratangang nagnakaw ng ilang nakasampay na mga panty sa naturang bahay.

Sinubukan pa umano ng nakatatandang Daño na pigilan ang anak at nagpasaklolo na rin sa mga barangay tanod.

Agad tumakas ang suspek at isusugod na sana sa ospital si Romorosa ngunit, wala na rin itong buhay.

Pinaniniwalaang hinampas ng matigas na bagay sa kanyang ulo ang biktima na naging sanhi ng agaran nitong pagkamatay.

Nang siyasatin ng pulisya, nakita ang dalawang panty sa loob ng brief ng biktima.Patuloy na ang pagtugis ng mga awtoridad sa suspek.