PAGULAYAN, 5TH PLACE; 9TH PLACE SI CHUA SA WORLD 10-BALL

DINOMINA ng magkapatid na cue artists mula sa Taiwan ang podium ng 2019 Predator World 10-Ball Championship matapos na magkampeon si Ping-Chung Ko at pumangatlo ang mas nakatatandang si Pin-Yi Ko sa palaruan ng Rio All Suites Hotel and Casino sa Las Vegas, Nevada.

Matamlay ang mga kinatawan ng lahing kayumanggi sa torneo dahil nagkasya lang sa pang-limang baytang si Alex Pagulayan habang si Johann Chua ay nakihati sa pangsiyam na upuan. Kabuuang 64 piling cue artists mula sa iba’t-ibang bahagi ng mundo ang mga piling kalahok dito.

Apat na taon na ang nakakalipas nang huling mag­karoon ng world 10-ball championship. Sa torneong ito noong 2015, si Ping-Chung ang pumangatlo at si Pin-Yi ang nakaakyat sa trono. Hindi pumayag si Ping-Chung na muling makawala sa kanya ang korona nang daigin nito sa finals ang World 9-Ball Championship king na si Joshua Filler, 10-7, upang maselyuhan ang top purse na $30,000 at siguraduhing hindi mawawala sa Taiwan ang korona ng world 10-ball.

Kasama sa mga nabiktima ng kampeon bukod kay Filler, ang kasalukuyang pinakamalupit na manunum­bok sa buong mundo base sa listahan ng World Pool-Billiard Association (WPA), ay ang sorpresang se­mifinalist mula sa Japan na si Masato Yoshioka (10-3) at si Fil-Canadian Pagulayan noong quarterfinals (10-4).

Dahil sa pagkatalo sa eventual champion, nagkasya si Pagulayan sa pampalubag-loob na $5,000 samantala, $2,500 ang naibulsa ni Chua dahil sa unang sultada pa lang sa knockout round, kumurap na agad ang Pinoy sa kamay ni Pin-Yi Ko sa iskor na 2-10.