P-Digong, next erap dahil sa jueteng!

KA AMBO / BISTADO

NATUPAD ang “wish” ni P-Digong kontra korupsiyon nang biglang lumindol nang malakas noong Sabado.

Huh, Batasan ‘ang sinabi’ ni P-Digong, hindi Batanes!

◘◘◘

AABOT sa mahigit 100 ang Customs personnel na sisibakin at kakasuhan dahil sa korupsiyon.

P-Digong, mag-wish ka pa, baka ma-bullseye na ang Adwana!

◘◘◘

DAHIL sa sobrang korupsiyon, hindi ang Kongreso at Malacañang ang ipinasara ni P-Digong.

Biglang isinarado ang PCSO nang parang kidlat!

◘◘◘

ANG STL ay pinatatakbo raw mismo ng mga jueteng lord.

Matagal na ‘yan!

◘◘◘

ANO ang kahulugan sa ‘pagsasarado’ ng PCSO?

Ibig sabihin, balik ang tradisyunal na jueteng, nasa ilalim ito ngayon ng mga gangster at mafia!

◘◘◘

BUHAY ang intelihensiya ng mga pulis-patola.

Kapag walang “tongpats” huli ka, kapag okay ang “tara”, tuluy-tuloy lang ang “bola ng papelitos” sa bumibiyaheng jeepney sa probinsiya!

◘◘◘

KAPAG sinuri ang dokumento ng STL, lalabas ang “pangalan” mismo ng gambling lords at mga “dummies”.

Malinaw ang ebiden­siya sa STL cum jueteng!

◘◘◘

HINDI maaaring umi­ral nang mahabang panahon ang STL cum jueteng nang walang “tongpats” sa mga ehekutibo ng PCSO.

Ang STL cum jueteng ay “kanser” sa korup na gobyerno!

◘◘◘

MAGING ang lotto ay kaduda-duda dahil may 2 winners; 3 winners at 4 winners sa jackpot.

Ang solo winner, batay sa matematika ay halos imposible, bakit nagkakaroon ng multiple winner?

◘◘◘

BUMAGSAK sa poder si ‘Erap’ dahil sa jueteng na tinangkang isa-legal.

Ngayon, si P-Digong ba ang babagsak o sino sa kanyang mga “alalay” ang masisibak?

◘◘◘

MAY prangkisa ang mga lotto outlet, makakasuhan ba ang gobyerno kapag binalewala ito?

Maselang debate ‘yan!

◘◘◘

NAPAKARAMING nawalan ng trabaho sa pagsasarado ng lotto outlets at iba pang PCSO games.

Maraming lotto outlets ang biglang nabangkarote.

Milyun-milyong adik sa lotto ang nawalan ng “pangarap”, pero nailigtas ang kanilang salapi!

◘◘◘

SA lotto, kahit hindi ka pa nananalo at tumataya pa lamang, may “tax” agad ang kada taya mo.

Isang raket na ang biktima ay ordinaryong mamamayan.

Dapat talagang isarado ito!