Parami nang parami ang nabibiktima | Patayan sa bansa parang dengue, isa nang epidemya!

FR. ROBERT P. REYES / PATAKBO-TAKBO

TULAD ng dengue, kabi-kabila na rin ang patayan. Animo’y lamok ang mga may hawak ng baril sinuman ang mga ito, alagad man ng batas o kriminal. Hindi ba, ma­ituturing nang epidemya ang patayan sa ating ban­sa?

Hindi natin masya­dong naririnig ang tung­kol sa mga biktima ng EJK. Napakarami nito ngunit, tila hindi naiba­balita. Hin­di ito normal sa maayos at mapaya­pang lipunan.

Kung unti-unti nang namanhid ang marami o hindi mo na sila maring­gan tungkol sa mga pa­tayan sa ating bansa, ka­ilangang mabulabog at mabahala tayo tulad ng pagkabahala natin sa pagkalat ng dengue.

Kung may ahensi­yang nananawagang la­banan ang dengue, dapat may­roon ding ahensi­yang manawagan na iti­gil na ang epidemya ng pata­yan sa ating bansa. Sini­sikap gawin ito ng Ko­misyon ng Karapa­tang-Pantao subalit, sa pagtu­pad ng kanilang mandato, sukdulang bati­kos ang kanilang ina­abot.

Sa mga nagdaang araw na sunud-sunod ang pagpatay na naga­nap sa Negros Oriental, nag­ta­nong si Bishop Ge­radro Alminasa: “Ano ang nang­yayari sa ating isla? Na­nanawagan ako sa la­hat ng mga pari at lider-layko na nagsisilbi sa ating lugar na magkita-kita, mag-usap, magda­sal at ha­na­pin ang nara­rapat na kolektibong pag­kilos bilang tugon sa lumala­lang sitwasyon. Kaila­ngan ito upang hindi tayo mawalan ng pag-asa, magsawalam-ba­hala at mawalan ng pa­kiramdam. Kaila­ngang matigil na ito (pata­yan).”

Sa panawagan ng Obispo ng Diyosesis ng San Carlos, narinig natin ang opisyal na tinig ng Simbahan na nanawa­gang hanapan ng solus­yon ang “epidemya ng patayan.”

Kailangang linisin ang kapaligiran at hanapin ang maaaring pag-ana­kan ng naturang prob­lema. Hindi sapat ang umasa sa pamahalaan, kailangang magtulungan ang lahat upang matigil ang pagka­lat ng epi­demya.

Hindi simpleng prob­le­ma ang patayan sa ban­sa. Narating na nito ang antas ng pagiging epi­demya kahit ang mis­mong ulat ng kapulisan, libu-libo na ang nama­matay sa giyera kontra iligal na droga ng kasa­lukuyang administras­yon.

Ayon sa ulat: “Du­ring week 24, 2019, a total of 2,781 dengue cases were reported na­tionwide. As of 15 June 2019, the cumu­lative num­ber of cases was 92,267 with 398 deaths. This is higher compared to 50,145 cases with 275 deaths reported during the same period last year. July 4, 2019.” Malinaw na hindi lahat ng dina­rapuan ng dengue ay na­mamatay. Noong Hunyo 2019, sa 92,267 kaso ng dengue, 398 dito ang namatay.

Bagama’t, na­kama­matay ang kagat ng lamok na may dengue, higit na nakamamatay ang bala ng baril. Tingnan natin ang ilang tanong na kaila­ngang hanapan ng sagot: Sino ang may ha­wak ng baril? Saan galing ang kanyang baril? Bakit niya ito ginagawa?

Iilang tanong lang ito na maaari nating pag-usapan at hanapan ng sagot ngunit, kung baba­likan natin ang naunang tanong kung “epidemya na ang patayan sa ating bansa” nararapat lang na kumilos tayo bago pa ito lumala at marami pang mamatay.