MGA KATUTUBO SA PALAWAN, BIDA SA INDIGENOUS GAMES

MULING matutunghayan ang mga tradisyunal na laro ng mga matatandang tribo ng Palawan sa ilalargang Indigenous Peoples Games sa Puerto Princesa City.

Pormal na binuksan ang natatanging programa ng Philippine Sports Commission (PSC) sa pangangasiwa ni Chairman William ‘Butch’ Ramirez kahapon tampok ang parade ng mga kalahok at IP Forum na pinangunahan ni Mindanao State University (MSU)-Marawi City Professor Henry Daut sa VJR Hall of the Provincial Capitol.

Bibigyang kahalagahan ni Daut, ang usapin na “Restoring the Heritage, Reliving the Past, and Rekindling the Spirit.” Ipaliliwanag din ni retired Professor Dr. Paul D. Jagmis, Sr. mula sa Municipality ng Aborlan ang tungkol sa kultura ng mga katutubo sa Palawan at dapat itong ipagpatuloy ng mga kabataan lalo na sa larangan ng sports.

Ayon kay PSC Commissioner at Officer-in-Charge Charles Raymond A. Maxey, kabuuang 50 individual mula sa iba’t ibang komunidad ng mga tribo sa lalawigan ang lalahok sa IP Forum bago simulan ang laro.

Bahagi ng mandato ng PSC ang tulungan ang mga tribal leaders na mapanatili at malinang ang mga tradisyunal na laro sa kanilang komunidad. (MC)