FELIPE, BETERANONG ASTIG SA PEDALAN, NAMAYAGPAG

KARGADO ng karanasan sa international races sina Marcelo Felipe, Marc Ryan Lago, Ismael Gorospe, Jr. at Marella Salamat kung kaya nagwagi ang mga ito sa road races ng PhilCycling 2019 National Road Cycling Championships noong Miyerkules sa Tagaytay City.

Solong nakatawid sa finish line si Felipe, ang captain ng continental team 7 Eleven-Cliqq Roadbike Philippines at 3rd sa Best Asian Rider sa 2018 Le Tour de Langkawi, sa loob ng 3 oras, 11 minuto at .212 segundo para pagharian ang 132.08-km Men’s Road Race na nagsimula at nagtapos sa Praying Hands Monument sa Aguinaldo Highway, Tagaytay City.

Nanguna rin si Philippine Navy-Standard Insurance’s Ronald Oranza, kay 7-Eleven rider, individual time trial winner Mark John Lexer Galedo sa isang sprint finish para sa silver medal. May oras si Oranza na 3:12:47.015 kasunod ng 2 segundo si Galedo.

Si Go-For-Gold Lago na 5th sa Men Junior ITT ng Asian Cycling Championships sa Uzbekistan noong Abril ay umaarangkadang una sa 91.35-km event category, sa oras na 2:24:26.911 at 3 minutong nauna kina Rench Michael Bondoc at Efren Reyes na may parehong oras.

Naungusan ni Gorospe, ng GFG continental team, si ITT champion Nichol Pareja para sa Men U-23 gold medal ng PhilCycling ni Abraham Tolentino at Ube Media Inc.-Le Tour de Filipinas.

Gumulong sa meta si Gorospe na may oras na 3:13:36.60, kasunod si Pareja. Bumuntot sa 6 na segundo si Daniel Ven Cariño para sa bronze medal. Napalawig ng PHL Navy-Standard Insurance ang dominasyon sa women’s races kung saan nanguna si Salamat, ang 2015 SEAG ITT gold medalist, sa teammate na si ITT titlist Jermyn Prado sa Women Elite 91.35-km race. (MC)