ATHLETICS AT AQUATICS STADIUM PARA SA SEAG CLARK, MATATAPOS NA

ILANG araw na lang at matatapos na ang athletics at aquatics stadium para sa 2019 Southeast Asian Games na matatagpuan sa ginagawang New Clark City sa Capas, Tarlac.

Ito ang tiniyak ng pamunuan ng Bases Conversion and Development Authority (BCDA) at ng MTD Philippines na kontraktor ng dalawang stadium na gagamitin para sa SEA Games sa Nobyembre.

Ayon kay BCDA president at CEO Vince Dizon, inaasahang makukumpleto na ang mga pasilidad sa Agosto 31. Ito ay maaga pa sa unang target na Nobyembre 2019.

“Our hardworking athletes deserve training facilities that are world-class. We hope the New Clark City Sports Complex will inspire and motivate our athletes in the upcoming SEA Games,” wika ni Dizon.

Ang athletics center ay puwedeng magpasok ng 20,000 na tao, habang ang aquatics center ay puwedeng magpasok ng 2,000 katao para sa SEA Games. Sa ngayon ay ginagawa pa rin ang aquatics center at ito ay 90 porsiyentong kumpleto na.

Ang athletics at aquatics center ay pumasa rin sa standard ng International Association of Athletics Federations (IAAF) at ng International Swimming Federation (FINA).

Ito ang magiging kauna-unahang sports complex na ginawa sa Pilipinas matapos ang Rizal Memorial Sports Complex noong 1934.