Taiwanese na may utang, ikinulong sa hotel | 2 CHINESE, ARESTADO

HULI ang dalawang Chinese nang ikulong nila ang isang Taiwanese hinggil sa pagkakautang dahil sa sugal na iniulat kahapon sa Pasay City.

Nakapiit sa detention cell ng Pasay City Police at nahaharap sa kasong illegal detention ang mga suspek na sina Zhang Shian, 31, tourist, at Yan Ming Jian, 27, kapwa ng Roxas Blvd, Parañaque City.

Kinilala naman ni Pasay City Police Chief Police Colonel Bernard Yang, ang biktimang si Tsai Yen-Chen, Taiwanese, nagtatrabaho sa isang online gaming.

Ayon sa hepe ng Pasay Police, alas-9:40 ng umaga nang mahuli ng kanyang mga tauhan ang mga suspek sa Room Seriac Siayan Travellers Inn sa Bgy. 191.

Sa pahayag ng biktimang si Yen-Chen, mula alas-4:00 ng madaling-araw hanggang alas-9:40 ng umaga ay ikinulong siya ng mga suspek sa nabanggit na travellers inn.

Nagkaroon umano sila ng pagtatalo hinggil sa pagkakautang ng biktima matapos silang magsugal sa isang casino.

Pinatawagan pa ng mga suspek ang biktima sa kanyang kaanak sa Taiwan at humihingi ng malaking halaga kapalit ng kanyang kalayaan.

Natunton lamang sa pinagdalhang hotel nang magawa nitong makapag-text sa kanyang kaibigan hanggang sa isinumbong nito sa mga awtoridad.