Walang pakialam sa bayan basta sumikat lang | Mga traydor sa hanay ng media, ibasura!

BOBI TIGLAO / BANAT

NAKAKASAWA at nakakainis ang patu­loy na pambabatikos ng mga dayuhang media, lalo na mga taga-Amerika at Europa kay Pangulong Rodrigo Duterte na libu-libo raw na mga inosente ang napapatay ng mga pulis sa ‘war on drugs’ ng kasalu­kuyang ad­minis­trasyon.

Paulit-ulit na sinasabing mahigit 5,375 daw ang “napapatay” ng mga awtoridad na sang­kot sa iligal na droga noong nakaraang tatlong taon, nanlaban daw ang mga ito sa pulis at walang magawa ang mga awtoridad kundi ang magpaputok na rin subalit, ipi­nagpipilitan ng mga dayuhang media na 30,000 na raw ang napapatay at karamihan nito ay inosente.

Totoong may mga inosenteng napapatay tulad ni Kian Loyd delos Santos ng Caloo­can, nadamay lang, pero kaunting insidente la­mang ito kung tutuusin.

Hindi maiiwasang mayroong mga lokong pulis o nananakot na magpaputok ng baril kahit hindi lumalaban ang inaaresto, pero kinasuhan ang mga ito ng pamahalaan tulad ng mga pulis na nakapatay kay Kian na natanggal sa serbisyo at nakulong.

Pero, ang tanong, saang digmaan ba wa­lang namamatay na mga inosente? Sa pag­dakdak ng mga dayuhan, hindi nila idinide­talye ang mga “napapatay daw na inosente”.

Ang masama, mismong gobyerno ng ibang bansa ang naniwala sa mga kasinunga­li­ngang ito kaya nagtagumpay ang Iceland na kumbinsehin ang United Nations Human Rights Council (UNHRC) na imbestigahan ang mga paratang na ito.

Kahiya-hiya tuloy ang ating bansa, pina­lalabas nilang grabe ang patayan sa atin. Tsk!

Alam ng bayan na kasinungalingan ang pinagsasabi ng mga dayuhang media. Sa totoo lang, kahit masakit pakinggan, mara­ming Pilipino ang hindi nagagalit sa pulis na matinding lumalaban sa ‘war on drugs’ dahil tunay na salot sa lipunan ang mga tulak ng iligal na droga.

Halimbawa, sa lugar na lang namin, ma­niniwala ba kayong ‘yung magtataho, na­diskubreng nagbebenta ng shabu?

Nawala ang distributor na ito mula nang inilunsad ni Pangulong Duterte ang kanyang giyera kontra iligal na droga.

Sa totoo lang, ang dapat sisihin sa gani­tong maling pananaw sa labas ng bansa ay ang kapwa nating Pinoy na mamamahayag na nagkakalat ng ganitong mga kasinunga­lingan.

Dalawang dilawang media ang matin­ding gumawa raw nito, ang Philippine Daily Inqui­rer at ang online news website based na Rap­pler na pinamumunuan ni Maria Ressa.

Dapat sisihin ang mga Pinoy na nagta­tra­baho sa mga dayuhang media na nag-uulat na grabe raw ang patayan sa ating bansa da­hil sa giyera kontra iligal na droga ng gobyer­nong Duterte.

Siyempre, ang mga dayuhang media, na­niniwala sa kasinungalingang sinasabi mismo ng ilang mga Pinoy na mamamahayag dahil bansa nila mismo ang kanilang tinutukoy.

Hindi tayo makapaniwalang may mga traydor sa bayan sa hanay ng media, walang pakialam sa bayan basta sumikat lang!