SBU RED LIONS, SINAKMAL ANG GENERALS SA ON TOUR

PINASARAP muna ng bumibisitang San Beda University ang laro bago magising sa tamang panahon upang bugbugin ang Emilio Aguinaldo College, 89-72, sa pagsisimula ng “NCAA On Tour” ng 95th National Collegiate Athletic Association sa EAC-Manila Sports Center, Huwebes ng hapon. Ito na ang ikatlong sunod na panalo ng defending champion upang solohin ang liderato ng liga habang bumaba sa 1-2 ang Generals.

Dala ng mga maingay nilang kamag-aral, bumanat agad ang EAC sa unang tatlong minuto at lumamang, 12-2. Tumawag ng timeout si coach Boyet Fernandez ng SBU at ito ang naging hudyat ng 17 sunud-sunod na puntos tampok ang dalawang tres ni James Canlas Kwekuteye upang mailipat ang kalamangan sa Red Lions at hindi na sila lumingon pa pagkatapos ng unang quarter, 24-16.

Binuhat ni Canlas Kwekuteye ang Red Lions at nagtapos na may 21 puntos buhat sa apat na tres. Tinulungan siya nina Evan Nelle na may 15 puntos at 7 assists, Calvin Oftana na may 14 puntos at Donald Tankoua na may 13 puntos at humakot ng 11 rebounds.