Sports leaders na naglalaway sa pondo, manahimik!

KA AMBO / BISTADO

MATULOY pa kaya ang Southeast Asian Games na magsisilbing host ang Pilipinas bago matapos ang taong ito?

Nagaganid kasi sa pondo ang mga sports leader ng bansa!

◘◘◘

NAGBABATUHAN ng akusasyon ang mga lider ng sports na nahahati sa dalawang pangkat.

Paano ito mareresolba ni P-Digong?

◘◘◘

SINASABING tandem ngayon sina Peping Cojuangco, dating Philippine Olympic Committee (POC) at dating Philippine Sports Commission (PSC) Chairman Philip Juico na pangulo ng athletics.

Kumalat ang ulat na binawi ni P-Digong ang bendisyon sa Philippine Southeast Asian Games Organizational Committee (PHISGOC)!

◘◘◘

NAGSISILBING chairman ng PHISGOC si incoming Speaker Taguig-Pateros Cong. Alan Peter Cayetano.

Itinanggi ng kampo ni Cayetano na hindi awtorisado ni P-Digong ang PHISGOC na pangasiwaan ang SEA Games na nakatakda ngayong Nobyembre!

◘◘◘

SA totoo lang, naglabas si P-Digong ng Memorandum Circular No.56 noong Enero 25.

Nag-aatas ito sa lahat ng government agencies na ibigay ang suporta sa PHISGOC Foundation, Inc. para sa “preparation, organization and holding of the 30th Southeast Asian Games”!

◘◘◘

NILAGDAAN ni Executive Secretary Salvador Medialdea ang memorandum na may authority ng pangulo.

Nagsasaad ito na: “PHISGOC, Inc. is a non-stock, non-profit organization” “created to oversee the preparations and execution of the Philippines’ hosting of the 30th SEA Games in 2019"!

◘◘◘

INAPRUBAHAN din ni P-Duterte ang dagdag na P1 billion para sa SEA Games dahil sa pakiusap ni Rep. Cayetano.

Ito ay pandagdag sa badyet ng SEA Games matapos na P5 billion lang ang naaprubahan ng Kongreso sa P7.5 billion na hiningi ng PHISGOC para sa event na ito!

◘◘◘

KASAMA ni Cayetano sa pagbibigay ng updates sa pangulo at gabinete sina Bases Conversion Development Authority (BCDA) President and CEO Vince Dizon at Executive Board member and PHISGOC Chief Operating Officer Ramon Suzara.

Napagkasunduan din sa cabinet meeting na ang Department of Budget and Management (DBM) ang tutulong sa PSC na makakalap ng supplies, sporting goods and equipment at service contractors!

◘◘◘

TULAD ng nangyari noong 2005, nang mag-host ang Pilipinas ng SEA Games, ‘di ba, nakasuhan ang mga nangasiwa rito?

Ayon sa dating Philippine Sports Commission chairman, may P73.2 million daw ang hindi na-liquidate ni Peping na pondong ginamit sa SEA Games noong taong ‘yun!

◘◘◘

DAPAT manahimik na lang ang ilang sports leaders na naglalaway sa pondo.

Dapat makiisa na lamang ang mga ito sa maayos na preparasyon sa biennial meet na lalahukan ng mga kalapit bansa.

Mahirap bang intindihan ‘yan?