Sexual harassment sa trabaho, iskul, online, pati sa tibo at bading | KULONG AT MULTA SA BASTOS!

GANAP nang batas ang Safe Space Bill o Anti-Bastos Bill na naglalayong la­banan ang gender-based sexual harass­ment sa kalsada, public places, online, workplaces at educational and training institutions.

Pinirmahan ni Pangulong Rodrigo Duterte ang naturang batas noong Abril 17, 2019, taliwas na naunang naiulat na awtomatiko itong naging batas nang hindi aksi­yunan ng pangulo.

Batay sa Republic Act No. 11313, bawal ang pani­nipol, panghihipo, mga homophobic, transphobic o mysogynistic remarks o mga negatibo at seksuwal na patutsada sa mga babae at maging sa miyembro ng LGBT, unwanted invitations at iba pang uri ng gender-based harassment.

Minamandato sa local government units na mag­pasa ng ordinansa para rito at inaatasan ang MMDA at PNP na siyang manghuli ng mga lalabag sa mga probisyon sa batas.

Kaugnay nito, papatawan ng P1,000 hanggang P100,000 multa at maaaring makulong ng hanggang isang buwan ang lalabag sa batas depende sa uri ng gender-based harassment.

Kasama rin sa tinukoy ng batas ang iba’t ibang uri ng online sexual harassment tulad ng online inti­midation, invasion of privacy, cyberstalking at maging harassment sa educational at training institutions.