Mula recruitment hanggang pagbabalik-bansa | DEPARTMENT OF OFW, TUTUTUKAN

TUTUTUKAN ni Se­nador Christopher ‘Bong’ Go ang pagtatatag ng Depart­ment of Overseas Filipino Worker (DOFW) alinsunod sa kagustuhan ni Pa­ngulong Rodrigo Duterte para bigyan ng atensiyon ang lahat ng pangangailangan at proble­ma ng mga OFW at ng ka­nilang pamilya.

Bago pa man nagsalita ang pangulo sa OFW Sum­mit na ginanap sa Camp Agui­­naldo, Quezon City noong nakaraang linggo hinggil sa agarang pagtatatag ng naturang ahensiya, nai­sampa na ni Go ang isang pa­nukalang-batas na mag­tatatag ng nasabing ahensiya.

Aniya, nais ng pangulo na ang itatatag na DOFW ay hindi lamang takbuhan ng mga OFW kapag may prob­lema kundi pati na rin ang pag­babantay sa recruitment at placement agency sa ibang bansa hanggang sa kanilang pagbabalik sa Pilipinas ma­tapos ng kani-kanilang mga kontrata.

Sa nasabing panukala, ang trabaho ng POEA, OWWA at OUMWA ay ma­­lilipat na sa DOFW dahil ang nasabing ahensiya na ang tututok mula sa recruit­ment hang­gang sa makabalik sa bansa ang OFW.

Umaasa ang senador mula sa Davao na agad na mai­papasa ang kanyang panuka­lang-batas dahil ito ay seser­tipikahan ng pangulo bilang ‘urgent bill’ at kaila­ngang maipasa sa lalong madaling panahon.