Sanhi at sintomas ng pagkakaroon ng tubig sa baga

SHANE M. LUDOVICE, M.D / SABI NI DOC

Dear Doc. Shane, Maaari bang talakayin ninyo ang tungkol sa pagkakaroon ng tubig sa baga kung ano ang sanhi at mga sintomas nito? — Junel

Sagot Ang tubig sa baga o pulmonary edema ay kondisyon kung saan napupuno ng tubig ang baga ng tao. Kapag nangyari ang kondisyong ito, ang katawan ng pasyenteng may tubig sa baga ay mahihirapang makakuha ng sapat na oxygen para mabuhay.

Ang pagkakaroon ng sakit sa puso ang pangunahing dahilan ng pagkakaroon ng tubig sa baga. Kapag ang pasyente ay may problema sa puso, mahihirapan itong magbomba ng sapat na dugo sa iba’t ibang bahagi ng katawan.

Kapag may tubig ang baga, nagtatrabaho ng doble ang puso para makapagsuplay ng dugo sa buong katawan. Ito ay nakadaragdag ng hindi kinakailangang pressure sa maliliit na mga ugat sa baga at para maibsan ang pressure na ito, ang maliliit na ugat sa baga ay kailangang magpalabas ng tubig na naiipon sa baga.

Narito ang ilan sa mga salik ng pagkakaroon ng mapanganib na sakit sa baga:

• dati nang nagkatubig sa baga

• nagkaroon ng sakit sa baga tulad ng TB at chronic obstructive pulmonary disorder o COPD

• pagkakaroon ng sakit sa dugo

Narito ang mga sanhi ng pagkakaroon ng tubig sa baga:

• atake sa puso o iba pang sakit sa puso

• pagkipot sa mga balbula ng puso

• biglaang pagtaas ng presyon ng dugo

• pagkakaroon ng pulmonya

• sakit sa bato

• sakit sa baga dulot ng matinding impeksiyon

• matinding impeksiyon sa dugo o sepsis

• pamamaga ng lapay o pancreatitis

• paggamit at pag-abuso sa iligal na droga

• pagkasira ng baga dahil sa pagkalanghap ng lason

• pagkakaroon ng matinding trauma

• pagkalunod

Narito ang mga sintomas nito:

• hirap sa paghinga

• pagtunog ng baga kapag humihinga (parang sumisipol)

• pag-ubo ng dugo

• matinding pagpapawis

• pagbawas ng pagiging alerto

• pamamaga ng mga paa

• hindi normal na tibok ng puso

Narito ang mga paraan upang maiwasan ang pagkakaroon nito:

• pagpapabakuna laban sa pulmonya

• pagpapabakuna laban sa trangkaso, lalo na kung may sakit sa puso o matanda na

• patuloy na pag-inom ng gamot pampaihi kung kagagaling lang sa sakit na ito

• regular na pagpapa-check-up sa doktor

• paghinto sa paninigarilyo at paggamit ng iligal na droga

• mag-ehersisyo

• kumain ng masusustansiyang pagkain

• pagpapanatili ng tamang timbang