BLAZE SPIKERS, GINIMBAL ANG LIFESAVERS SA PSL

SINABUYAN ng malamig na gasolina ng reigning champion Petron Blaze Spikers ang mainit na laro ng Generika-Ayala at kinabig ang 25-18, 25-12, 25-16 na panalo sa Philippine Super Liga All-Filipino Conference kagabi sa Bacoor Strike Gym sa Bacoor City.

Mahusay na laro ang ipinakita ni Skipper Frances Molina, pinangunahan ang Blaze Spikers para sa pagkabig ng ika-5 panalo sa anim na laro sa prestihiyosong women’s club tourney.

Namuno si Molina, ang huling nalalabing player ng Petron, para mangwalis ng final game para sa All-Filipino title noong 2015, para sa 10 kills, 2 aces at 12 puntos habang si Sisi Rondina ay may 8 atake, 2 aces at block sa kabuuang 11-hit performance.

Samantala, tumapos si dating national team skipper Mika Reyes ng 10 puntos na sinamahan ng 4 blocks na nagdomina sa depensa ng Blaze Spikers sa kabuuan ng laban na nagtagal ng 78 minuto. “We’ve been struggling the past few games, but good thing we’re slowly getting into our real game. Although we’re not yet in our 100 percent, we’re already moving well inside the court,” ayon kay Petron coach Shaq Delos Santos.

Naging instrumento rin sina Aiza Maizo-Pontillas at Remy Palma na may tig-7 puntos habang si Rhea Dimaculangan ay mahusay ding setting ang inilaro sa bisa ng 18 excellent digs dagdag pa ang 7 excellent receptions ni libero Buding Duremdes. Napigilan ng Blaze ang attackers ng Lifesavers na sina Fiola Ceballos at Patty Orendain. “They followed our game plan and they stopped Generika’s attackers,” ani Delos Santos.

Tanging si Angeli Araneta ang malakas na lumaro sa bisa ng 9 puntos habang sina Ceballos at Orendain ay tumapos lang ng 5 at 2 puntos. Lagpak ang Lifesavers sa solo third standings na may 4-2 win-loss mark. (MC/VA)

Laro Bukas: (Muntinlupa Sports Center) 4:15 p.m. – Marinerang Pilipina vs F2 Logistics 7:00 p.m. – Generika-Ayala vs PLDT