Tanod, tiklo sa baril at pananakot

KALABOSO ang isang barangay tanod matapos ireklamo ng pananakot at panunutok ng baril sa Ma­labon City, kamakalawa ng gabi.

Kinilala ni Malabon Po­lice Chief P/Col. Jessie Ta­mayao ang naarestong suspek na si Ronald Roxas alyas RR, 34, tanod ng Bgy. Tonsuya na nahaharap sa kasong threat at paglabag sa R.A 10591 habang pinag­hahanap ang kasama nitong si alyas Abet.

Sa pahayag sa pulisya ng biktimang si Michael Paguia, 32, sailing installer, alas-6:45 ng gabi, nakaupo siya sa kan­yang motorsiklo sa Blk. 4, Kadima, Bgy. Tonsuya nang sumulpot ang mga suspek at sa hindi malamang dahilan ay inundayan siya ng saksak ni ‘Abet’. Nagawang ma­kailag ni Paguia subalit, itinu­lak ito ni Roxas sabay nagla­bas ng baril sa kanyang sling bag saka pinagbantaan ang bik­tima.

Humingi ng tulong ang biktima sa pulisya na nagre­sulta sa pagkakaaresto kay Roxas at narekober sa kanya ang cal. .38 revolver na kar­gado ng limang bala.