BUHAWI NG TORNADOES, NILUNOD ANG MARINERA

PINALUBOG sa lakas ng buhawi ng Foton Tornadoes ang Marinerang Pilipina sa paglarga ng panalo tungo sa 27-25, 25-15, 25-20 na iskor sa Philippine Superliga All-Filipino Conference Spike on Tour kagabi sa Malolos Sports and Convention Center sa Malolos City.

Tumingkad ang performance nina Jaja Santiago, Elaine Kasilag at Maika Ortiz para sa Tornadoes sa ikatlong panalo sa anim na laro sa prestihiyosong women’s club tourney. Pinangunahan ni 6-foot-5 Santiago ang pagdeliber ng 8 atake at 4 blocks habang si Kasilag ay may 8 spikes, 2 aces at 2 blocks para sa Tornadoes, na nangailangan pa ng 74 na minuto upang dominahin ang Lady Skippers.

Impresibo rin si Ortiz, ang national team mainstay sa nagawa niyang 11 hits. “It was a good win for us, we can start to build a momentum from this win,” ayon kay Foton coach Aaron Velez, kung saan ang team ay galing sa four-set victory kontra PLDT ng nakaraang linggo. “I’m really glad to see the team step up, especially after that opening set where we gained our composure, after that set we were able to relax. Had we lost that set, the outcome could have been different.” May tig-7 puntos sina Dindin Manabat at Marian Buitre para sa Tornadoes, na sinamantala ang tangkad sa bisa ng 13 blocks laban sa Lady Skippers.

Samantala, sina Judith Abil at Chiara Permentilla ay may 10 points para sa Marinerang Pilipina, na wala pa ring panalo sa 5 laban. (VA/MC)

Laro sa Martes: (Bacoor Strike Gym)

4:15 p.m. – Generika-Ayala vs Petron

7:00 p.m. – Foton vs Cignal