Mga “collateral damage” na nangyayari sa operasyon ng mga pulis, ‘wag dedmahin!
KASUNOD sa pagkamatay ng tatlong taong gulang na batang si Myka Ulpina na nabaril sa gitna ng engkuwentro sa pagitan ng umano’y mga tulak ng iligal na droga at mga pulis sa Rodriguez, Rizal, sinabi ng Commission on Human Rights (CHR) na kahit hindi maiiwasan ang tinatawag na “collateral damage” sa police operation, hindi umano dapat dedmahin ang mga ganitong isyu.
Kung saan dapat magsagawa nang masusing imbestigasyon para mapatunayang walang nagawang pagkakamali ang mga pulis sa operasyon para madamay ang bata.
Gayunman, ipinaalala ng CHR sa gobyerno na tiyaking natutupad ng mga ito ang mga nakasaad sa Saligang-Batas at napoprotektahan ang ibang tao, lalo na kung magsasagawa ng mga hakbang na kinakailangang gamitan ng armas.
Samantala, sa rami ng mga engkuwentrong naganap sa ating bansa, imposibleng ngayon lang nangyari ang ganitong senaryo kung saan may nadamay na inosente na binawian ng buhay.
Subalit, ang tanong, kailan pa tayo mababahala para masolusyunan at makagawa ng ligtas na hakbang hinggil sa nangyari?
Nakalulungkot dahil ang batang namatay ay wala pang naiintindihan kung ano ang nangyayari sa kanyang kapaligiran.
Kaya ang panawagan natin sa mga kapulisan, mainam na sa bawat operasyong gagawin, siguraduhin ninyong walang ibang madadamay, partikular ang mga inosenteng batang walang kalaban-laban.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments