DIONES AT 6 PA, SASABAK SA VIETNAM OPEN ATHLETICS

BILANG final overseas exposure sa kanilang paghahanda sa Southeast Asian Games, lalahok ang pitong atleta sa pangunguna ni reigning triple jump champion Mark Harry Diones at kasalukuyang decathlon ruler Aries Toledo sa 26th Vietnam Open Athletics Championship na lalarga sa Hulyo 16 sa Sydney Olympic Park Centre sa Ho Chi Minh City kung saan ginawa ang 2003 edition ng biennial meet.

Kasama nina Diones at Toledo na makikipagsabayan sa mga kalaban galing sa 10 mga bansa sina Ronnie Malipay, Angel Carino, Mariano Masano, Edwin Giron at Filipino-American at dating SEA Games sprint queen Kyla Ashley Richardson.

Gagabayan nina coach George Noel Posadas at Joebert Delicano ang mga Pinoy sa kanilang kampanya sa taunang torneo na inorganisa ng Vietnam Athletics at may basbas ng Asian Athletics Association na sinuportahan ng Philippine Sports Commission na pinamumunuan ni Chairman William Ramirez.

Dito malalaman kung gaano kahanda ang mga Pinoy at karamihan ng kalahok ay mga atletang sasabak sa SEA Games.

“This tournament will test how really prepared physically and mentally in their quest for glory in the SEA Games,” sabi ni coach George Noel Posadas, asawa ni track legend Elma Muros-Posadas.