Para matahimik ang Kamara, term-sharing patulan na

KA AMBO / BISTADO

MAY ulat na naimbi­yer­na raw si P-Digong kay Rep. Lord Allan Velasco kaugnay ng bangayan sa Speakership sa Kamara.

Umatras kasi ito sa term-sharing na kanyang iminungkahi mismo sa pangulo kahati si Rep. Alan Peter Cayetano!

◘◘◘

BINABANSAGAN din siyang modernong ‘Pinokyo’ kasi nagsinu­ngaling daw siya sa pagsa­sa­bing walang naganap na kasunduan sa term-sharing sa harap ni P-Digong habang sila ay nasa Japan.

Nabisto siya nang kumpirmahin mismo ito ng pangulo sa talum­pati nito!

◘◘◘

PUMABOR si P-Du­terte sa term-sharing, lalo pa at napangakuan nito sina Rep. Cayetano at Rep. Velasco na tutu­lungan silang makuha ang posisyon ng House Speaker.

Inamin din ng pa­ngulo na bagamat, kaibigan niya ang isa pang Speakership can­didate na si Leyte Rep. Martin Romual­dez, wala itong panga­ko sa kongresista!

◘◘◘

NILINAW naman ni Cavite Rep Abraham Tolentino kung nais ng pangulo ang term-sharing ay agad silang tata­lima bilang nakaaalam ng makabubuti sa kan­yang administrasyon.

Pinalagan naman ng mga beteranong kongresista ang mau­gong na vote-buying para lamang makopo ang liderato ng Kamara!

◘◘◘

IDINETALYE mismo ng pangulo, ang nabuong kasunduan tungkol sa paghahati ng 3 taong termino bilang House Speaker nina Rep. Velasco at Rep. Cayetano.

Magsisilbi si Rep. Cayetano bilang Spea­ker sa unang 15 bu­wan at ang nalalabing 21 buwan ay aaktuhan naman ni Rep. Velasco!

◘◘◘

HINDI pa nagbibigay ng pahayag si Rep. Velasco kaugnay sa isyu na itinatwa niya ang kasunduan sa term-sharing.

Naniniwala ang ilang kongresista na walang ibang kauu­wian ang girian kundi ang magkasundo sa hatian ng termino upang matahimik na ang Kamara!