Sakay ang mayor, 19 iba pa | BANGKA LUMUBOG

KASAMA ang alkalde ng Almagro sa Samar sa 20 pasaherong nailigtas mula sa lumubog na bangka, kamakalawa ng hapon. Ayon sa inisyal na ulat mula sa Philippine Coast Guard Calbayog, Samar Station, naganap ang insidente bandang alas-3:00 ng hapon.

Kabilang sa grupo ni Mayor Amelia Cano ang ilang opisyal ng bayan at kanilang mga pamilya. Batay sa imbestigasyon, pauwi na sana sila sa Almagro mula sa Calbayog City kung saan sinaksihan nila ang panunumpa ng ilang opisyal ng lungsod.

Bukod sa kanila, sakay din ng bangka ang anim nitong pahinante.

Napag-alamang lumubog ang kanilang bangka matapos hampasin ng malaking alon. Agad nagsagawa ng rescue operation ang PCG kaya mabilis silang nailigtas. (BRT)