Panghihimasok ng China sa teritoryo ng bansa, sumusobra na!
NAGMISA tayo noong Miyerkules para sa isang grupo sa Mendiola. Ipinagdiwang ng grupo ang kanilang anibersaryo sa pagrosaryo sa tabi ng estatwa ni Don Chino Roces sa Mendiola.
Sa halip na manahimik ang grupo sa gitna ng sunud-sunod na pang-iinsulto sa Diyos, pinili nilang magdasal ng rosaryo upang ipakita ang kanilang pagkabagabag sa pang-iinsulto sa Diyos mula sa pinakamataas na opisyal ng bansa.
Mananalangin tayo ngunit, gagawin natin ito sa pampublikong lugar upang ipakita ang lalim ng ating hinanakit at pananampalataya sa Diyos.
Bumalik ang grupo sa Mendiola at sinamahan natin ito upang muling manalangin, magmisa at magrosaryo para sa patuloy na nagdurusang Inang Bayan. Hindi lumilinaw, bagkus, lalong lumalabo ang insidente ng pagbangga ng Chinese vessel sa bangkang-pangisda ng 22 kababayan nating mangingisda.
Kamakailan, ang bagong tugon ng pangulo ay payagang mangisda ang mga Tsino saanman sa karagatang sakop ng ating bansa. Sa halip na pagbawalan ang iligal na panghihimasok ng mga mangingisdang Tsino, binibigyan pa ang mga ito ng kalayaang mangisda.
Nakadidismaya dahil sumusobra na ang China sa kanilang panghihimasok sa ating teritoryo. Patuloy ang kanilang paglabag sa desisyong batay sa United Nations Convention on the Laws of the Sea (UNCLOS) na nagpapatunay ng ating karapatan sa 370 kilometrong Exclusive Economic Zone (EEZ).
Samantala, nagsalita na ang ilang opisyal laban sa pahayag ng pangulo kabilang si Associate Justice Antonio Carpio, hindi maaaring payagan ng pamahalaan ang mga Chinese na mangisda sa loob ng ating EZZ dahil ito ay labag sa Konstitusyon. Sa kabila nito, tinawag lamang na ‘stupid’ ng pangulo si Justice Antonio Carpio.
Matatandaang, noong isang araw, tinawag na “boba” ni DFA Sec. Teodoro “Teddyboy” Locsin, Jr. si Vice-President Leni Robredo sa sinabi nitong iligal ang pagtanggal ng karapatan sa mga opisyal na magkaroon ng courtesy diplomatic passport. Ang desisyong tanggalin ang diplomatic passport ay bilang tugon sa nangyari kay dating DFA Secretary Albert del Rosario.
Napakalutong magmura at mang-insulto ng mga opisyal ng ating bansa. “Stupid”, “boba”, “P.I.” at marami pang hindi kanais-nais na mga salita ang muling umiikot at pinagpipistahan. Sa halip na magalit at mainsulto ang karamihan, tila wala nang sigawan at palakpakan tulad noon. Hindi malinaw kung gaano kalalim ang epekto ng masamang pananalita at halimbawa na ibinibigay ng mga nakatatanda sa mga nakababata.
Makakaya pang maipagtanggol ang Inang Bayan kahit talunan at duwag ang posisyon ng ating pamahalaan. Nariyan ang mga mamamayang tunay na nagmamahal sa Diyos at sa kanilang bansa. Gising na, hindi tayo “stupid” at hindi rin tayo “boba”!
Comments