Dobleng pagbabantay sa mga lansangan laban sa mga palaboy na nananakit, gawin!
TAKOT, paniguradong ganito ang inyong mararamdaman kapag napanood ninyo ang viral video sa social media kung saan may lalaking bigla na lamang sumulpot sa kahabaan ng EDSA sa pagitan ng Guadalupe at Boni.
Sa dashcam video, makikitang hinarang ng lalaki ang motorista at inaambaang babatuhin ng hawak nitong bato ang kotse kung hindi siya bibigyan ng pera.
Ayon sa driver na si Mane Teodoro, magbibigay na dapat siya ng barya ngunit, P100 ang hinihingi ng lalaki kung saan pilit nitong ipinasok ang kanyang isang kamay sa bintana kaya napilitan siyang isara ito kung saan naipit ang lalaki kaya binato nito ang kanyang windshield at ginasgasan pa ang pinto.
Gayunman, hindi ito ang unang beses na may nakaranas na ganitong pangha-harass sa lansangan, pero nakababahala dahil marami sa mga taong kalsada ang gumagamit ng dahas para lang makahingi ng pera.
Kaya nais nating hingin ang atensiyon ng Metro Manila Development Authority (MMDA) na solusyunan sana ang mga ganitong insidente dahil sa totoo lang, malaking abala na ang naidudulot nito sa marami.
Bagama’t, marami na umano sa mga palaboy ang naialis sa EDSA, gumawa pa rin sana ng paraan ang awtoridad dahil paniguradong babalik at babalik ang mga ‘yan!
Samantala, doble-ingat para sa mga motorista at kung sakaling isa kayo sa maging biktima, mainam kung ipagbibigay-alam ninyo agad ito sa MMDA nang sa gayun ay hindi na maulit pa at tuluyan nang gawan ng batas kung kinakailangan.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments