Hirit ni P-DU30: Jueteng mas okay kaysa sa iligal na droga!
MARAMING Pilipino ang nakikipagsapalaran sa mga sugal, partikular sa jueteng na iligal.
Pero, sa talumpati ni Pangulong Rodrigo Duterte, sinabi niyang hindi umano niya ipatitigil ang operasyon ng jueteng sa bansa dahil kung mabubuwag ang network nito, posibleng ang aparatus ng iligal na droga ang pumalit dito.
Dagdag pa rito, hangga’t hindi nagiging maganda ang lagay ng ekonomiya sa Pilipinas, marami pa rin umano sa mga Pinoy ang patuloy na susugal sa buhay.
Samantala, ayon din sa pangulo, hindi umano niya maaaring utusan ang kapulisan na araw-araw magsagawa ng raid sa operasyon sa nasabing sugal dahil wala siyang sapat na puwersa at tauhan, gayundin, kung papipiliin siya sa pagitan ng iligal na droga at jueteng, pipiliin na lamang niya ang “lesser evil”.
Ang tanong, hindi pa ba sapat ang dami ng mga pulis, lalo na ngayong patuloy silang nadaragdagan? Hmmm...
Sa totoo lang, dahil likas na matigas ang ulo ng mga Pinoy, kahit ‘yung iligal ay patuloy pa rin nilang tinatangkilik, ito ay dahil naniniwala silang posible itong maging dahilan para makaahon sila sa kahirapan, ‘yun nga lang, nakatatakot na dahil hindi mapuksa-puksa ang iligal na droga, hinahayaan na lamang ng gobyerno ang ibang iligal na lumaganap pa na alam nating may masamang epekto rin para sa mamamayan.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments