PDP-Laban, NPC at Partylist Coalition pumalag | “WALA PA KAMING NAPIPILING SPEAKER”
UMALMA ang mga miyembro ng PDP-Laban, Partylist Coalition at Nationalist People’s Coalition (NPC) sa sinasabing suporta na nakuha ni Marinduque Rep. Lord Allan Velasco sa pagka-Speaker.
Kaugnay nito, naglabas ng paglilinaw ang tatlong partido at itinatanggi ang pagsuporta kay Velasco matapos lumabas ang kopya ng multi-party manifesto nitong Miyerkules na sumusuporta umano kay Velasco.
Ang dokumento ay pirmado ng ilang mga lider at representante ng nasabing mga grupo.
Ilang minuto matapos ilabas ang manifesto, ang 54-member na Partylist Coalition ay mariing itinanggi ang pagsuporta kay Velasco.
“As far as the coalition is concerned, we have yet to come up with the decision on who we will endorse as House Speaker,” ani Ako Bicol Partylist Rep. Alfredo Garbin, Jr.
Nang tanungin kung bakit kasali si 1-PACMAN Partylist Rep. Michael Romero sa mga pumirma sa multi-party manifesto, ani Garbin na nagawa ito malamang ni Romero bilang personal na desisyon at hindi ng buong coalition.
Samantala, inamin naman ni Senate President Vicente “Tito” Sotto III na nasorpresa siya kasama ang NPA sa lumabas na manifesto, paliwanag niya na wala pang desisyon ang partido sa opisyal na pagpili ng napipisil na bagong Speaker.
Para naman kay Albay Rep. Joey Salceda, inamin din niya na walang naganap na konsultasyon sa pagitan ng mga miyembro ng PDP-Laban bago ang nasabing endorsement kay Velasco.
Umalma rin ang congressman sa banta ni PDP-Laban President Koko Pimentel na parurusahan ang mga miyembro ng partido na hindi boboto kay Velasco, aniya, hindi nabu-bully o natatakot sa banta ang mga miyembro kung iba man ang kanilang piliin.
Nauna rito, mga kongresista mula sa partidong PDP-Laban, sa pangunguna nina Rep. Ronnie Zamora, Rep. Neptali ‘Boyet’ Gonzales II, Rep. Abraham Tolentino at Rep. Dan Fernandez, ay nagsama-sama upang ihayag ang kanilang buong suporta sa pagka-Speaker ni Taguig-Pateros Congressman Alan Peter Cayetano. (BRT)
Comments