Kakulangan ng guidance counselors sa mga paaralan, bigyang-pansin!

KUYA WIN GATCHALIAN / WIN TAYONG LAHAT

INIULAT ng Department of Education (DepEd) ang 22,059 kaso ng pambu-bully noong School Year 2016-2017. Sa kabila ng pagbaba ng bilang nito mula sa 32,129 noong S.Y. 2015-2016, hindi maikakailang kagulat-gulat na ganito pa rin kalaki ang sitwasyon ng “bullying” sa mga eskuwelahan.

Ayon sa depinisyon ng DepEd, ang bul­lying ay akto o serye ng akto na ginagawa ng estudyante sa isa pang estudyante na nagre­resulta ng pisikal at mental na pang-aabuso, pangha-harass, pananakot at panghihiya.

Dahil dito, lubos nating hinihikayat ang DepEd na iprayoridad ang paglalagay ng mga guidance counselor sa lahat ng elementary at high school upang matigil na ito at mabig­yang-suporta ang mga biktima.

Sa polisiya ng DepEd, dapat mayroong guidance counselor sa bawat 500 mag-aaral sa lahat ng publiko at pribadong elementarya at high school ngunit, ang Pilipinas ay may kabuuang 3,220 rehistradong guidance coun­selors lamang noong Hulyo 2017 mula noong unang batch ng licensure examinees noong 2008.

Sa pamamagitan ng mga guidance coun­selor na hasa na sa paglulutas ng ganitong uri ng suliranin, hindi lamang sila makapagbi­bigay ng ayuda sa mga biktima ng bullying kundi maging sa mga nambu-bully mismo upang maitama ang kanilang pagkakamali at matulungan silang magbago para sa ikabu­buti ng sarili at kanilang mga kamag-aral.

Tulad ng mga guro, makabuluhan ang ginagampanang papel ng mga guidance counselor dahil sila ang daan para maiwa­san na sila ay maging children-at-risk o CAR, children-in-conflict with the law o CICL o ang tinatawag na juvenile offenders students.

Sa paparating na ika-18 Kongreso nga­yong Hulyo, isa sa mga ihahain nating panu­kalang-batas sa Senado ay ang pag-aam­yen­da ng Republic Act No. 9258 o ang Guidance and Counseling Act of 2004 upang maka­kuha ang DepEd ng mas marami pang gui­dance counselors sa iba’t ibang paaralan.

Pag-aaralan nating maigi ang mga kaila­ngang baguhin sa kuwalipikasyon para sa guidance counselor licensure examination na nakasaad sa Section 13 ng nasabing batas dahil sinasabing ito raw ay masyadong ma­higpit ang requirements kaya kakaunti la­mang ang mga guidance and counseling graduate na nag-a-apply ng lisensiya.

Ayon sa mga eksperto at doktor, pang­sikolohikal na aspeto ang maaaring ma­apektuhan sa mga biktima ng pambu-bully.

Magdudulot ito sa estudyante ng takot, pagkabalisa at kawalan ng tiwala sa sarili, ayaw pumasok sa klase, pagkakaroon ng bayo­lenteng personalidad, depresyon o ang pinakamatindi ay ang pagpapakamatay.

Sa madaling salita, ang usaping ito ay hin­di madali at hindi biro at solusyon para rito ay kinakailangan.

Ating tandaan na katumbas ng kaha­la­gahan ng edukasyon ng kabataan ay ang se­guridad at kaligtasan nito mula sa anu­mang gulo at suliranin sa paaralan, lalo na sa bul­lying at iba pang tulad ng masasamang ga­wain.

Tututukan natin ito at sana ay malutas na sa lalong madaling panahon ang ka­kulangan ngayon sa guidance counselors at pag-aaralan ang kakailanganing budget para sa kanilang sahod.

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City o mag-email sa surewin.bulgar@gmail.com