‘Pag guilty sa pagkamatay ni Eddie Garcia — DOLE | GOODBYE GMA 7!

INIIMBESTIGAHAN na ng Occu­pational Safety and Health Center (OSHC) ang nangyari sa shooting na naging dahilan ng pagka­matay ng be­teranong aktor na si Eddie Garcia.

Ayon kay Labor Secre­tary Silvestre Bello III, kung mapatutunayang nagkaroon ng kakulangan sa panig ng GMA Network, maaari aniya itong pagmultahin.

Matatandaang, si Garcia, 90-anyos ay tila napatid at natumba habang nasa taping para sa isang TV series noong Hunyo 8 sa Tondo, Manila.

Na-comatose ang aktor ng halos dalawang linggo ba­go tuluyang pumanaw.

Paliwanag ni Bello, sa ila­lim ng Occupational Safety and Health (OSH) Law, kailangan mayroong OSH officer sa bawat estab­lisimyento at kailangang matiyak na ligtas ang work­place at sumusunod sa health standards.

Sinabi pa ni Bello na ka­sama rin sa iimbestigahan ang first aid na ginawa sa ak­tor tulad ng kung tama ang pag­kahawak dito.

Kung mayroon aniyang safety and health officer ay maaaring nabigyan ito ng ta­mang treatment nang ma­ganap ang insidente.

Kung mapatutunayang nagkasala, maaari aniyang mag­sampa ng kasong admi­nistratibo ang OSHC laban sa network kahit hindi ka­sama ang pamilya ng aktor.

Maliban sa multa, maaari aniyang mapatawan ng ‘sus­pension of operations’ ang network depende sa kung gaano kabigat ang pag­ku­kulang nito. Samantala, P100,000 kada araw ang multa na ma­aaring ipataw.

Sinabi naman ni OSHC Executive Director Noel Bi­nag na kung ang panganib ay dahil sa pagkukulang ng em­ployer, maaaring ipatigil ang operasyon nito.