Political dynasties, huwag isisi sa mga botante!
IISANG apelyido, iisa rin ang estilo, ganito ang nangyayari kapag magkakamag-anak ang namumuno sa gobyerno kung saan paulit-ulit ang mga kaganapan at nauumay na ang mamamayan.
Gayunman, inamin ni Pangulong Rodrigo Duterte na ang political dynasties ay totoong hindi nakabubuti sa bansa, pero kasalanan umano ito ng mga botante na naghahalal sa mga magkakamag-anak na kandidato.
Samantala, hindi dapat isisi sa mga botante ang nasabing isyu dahil hindi lingid sa ating kaalaman na maraming dayaang nagaganap tuwing halalan, nand’yan ang “vote-buying” na talamak noong nagdaang eleksiyon at kung umpisa pa lang ay hindi na pinapayagang tumakbo ang magkakamag-anak, eh, di walang dahilan para iboto sila ng taumbayan.
Dagdag pa rito, dahil may mga botanteng kulang sa kaalaman, ang ibinoboto na lang nila ay ‘yung kamag-anak ng kilala nilang politician hindi dahil ‘yun talaga ang gusto nila kundi dahil sikat ang apelyido at ang family background ay nababagay sa politika.
Ngayon, kung hindi pala nakabubuti ang political dynasties sa bansa, bakit hindi tuluyang ipatupad ang Senate Bill No. 1765 o ang Anti-Political Dynasty Act of 2018?
‘Ika nga, kung gusto natin ng pagbabago, baguhin natin ang mga namumuno sa gobyerno at palitan ng mga taong desididong maglilingkod sa bayan nang tapat at walang halong panloloko.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments