4 pulis, huli sa aktong nag-o-online sabong at nag-iinuman

ARESTADO ng bagong tatag na Integrity Monitoring and Enforcement Group (IMEG) ng PNP ang apat na pulis dahil sa pagsusugal at pag-inom sa pampublikong lugar.

Base sa ulat, nahuli ang apat na pulis alas-10:00 ng gabi ng Miyerkules sa Bgy. Bagong Lipunan, Cubao, Quezon City. Nakilala ang mga naaresto na sina Police Staff Sergeant Erwin Gobis, Police Senior Master Sergeant Demetrio Laroya, Police Corporal Ariel Pasion na mga nakatalaga sa PNP Health Service sa Camp Crame at Police Staff Sergeant Gerry Ocampo ng PNP Crime Lab.

Arestado rin ang Non-Uniformed Personnel na si Leo Ocinar, dating pulis na si Fidel Agustin at isang Teddy Carpio na may-ari ng establisimyento na nag-o-operate ng online sabong.

Narekober ng IMEG ang mga perang pantaya na nagkakahalaga ng mahigit P14,000, 2 television sets na ginagamit sa online gambling, digital video recorder, betting ticket, 2 digital box at 23 bote ng alak.

Nasa kustodiya ngayon ng IMEG ang mga pulis na mahaharap sa paglabag sa PD 1602 o Anti-Illegal Gambling Act at RA 6713 Code of Conduct and Ethical Standard for Public Officials and Employees.