30TH SEAG, TULOY SA NOBYEMBRE

“THE 30th Southeast Asian Games will push through,” ayon sa deklarasyon ni Philippine Sports Commission Chairman William Ramirez sa press briefing na idinaos kahapon.

Sa pagharap niya sa media sa gitna ng pagbabago sa liderato ng Philippine Olympic Committee ngayong linggo at balita hinggil sa paglipat ng petsa ng biennial meet, iniulat ni Ramirez na nakausap na niya si Executive Secretary Medialdea na nagpaabot din ng atas ng Pangulo sa sports chief.

Idinagdag niya na, “the President is aware of the issues but directed us to keep our focus on the athletes and let the others sort out their issues within their ranks.”

“We must isolate our athletes from all these issues so they can focus on their mission,” ayon kay Ramirez na siya ring Chef de Mission ng Team Philippines sa SEAG. Sinabi niya na nangako ang PSC na gagawin ang lahat ng paraan upang magabayan at masuportahan ang Team Philippines.

Sa muli niyang panawagan ng pakikiisa, nakiusap siya sa lahat na magkaisa, “for the sake of our athletes, let’s focus our 100% on the big tasks at hand.”

Pangungunahan ni Ramirez ang pag-host ng fellowship assembly sa pagitan ng NSA’s, national coaches at mga atleta sa Hulyo 5.