Dahil sa hindi matapus-tapos na pang-aabuso sa mga OFW, deployment ban sa Kuwait, aprubahan!

RYAN B. SISON / BOSES

HINDI na mabilang ang iba’t ibang kaso ng pang-aabuso sa mga Over­seas Filipino Worker (OFW) sa iba’t ibang panig ng bansa.

Gayunman, marami pa rin ang na­kikipagsapalaran para sa panganga­ila­ngan ng kanilang pamilya, kaya ka­hit wala silang kasiguraduhan na lig­tas ang kanilang seguridad ay ginagawa pa rin nila ito at nananatiling mata­pang.

Pero, ayon sa Department of La­bor and Employment (DOLE), maa­aring ipatupad muli ang deployment ban ng mga OFW sa Kuwait dahil umano sa nangyaring panghahalay ng airport personnel sa isang Pinay.

Kaya kahit hindi pa natatapos ang imbestigasyon, mainam siguro kung hindi lang sa salita ipakikita ang pag­papaigting ng kanilang proteksiyon.

Nakalulungkot dahil hanggang nga­yon ay hindi pa rin natutuldukan ang mga pangyayaring tulad nito, kailan nga ba ito matatapos?

Matatandaang, noong 2018 ay ipi­natigil na rin ang pagpapadala ng mga OFW sa Kuwait dahil sa brutal na pag­patay kay Joanna Demafelis, pero iti­nuloy pa rin ito dahil din sa kagustuhan ng iba nating kababayan na tanging sa ibang bansa lamang kumakapit para makaahon sa kahirapan.

Kaya ang hamon natin sa gobyer­no, maglatag at magsagawa ng ma­bisa at makabuluhang aksiyon para tuluyan nang matuldukan ang mga pang-aabuso sa ating mga kababa­yan.

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.